Free Software Community of India

ഇന്ത്യന്‍ സ്വതന്ത്ര സോഫ്റ്റ്‍വെയര്‍ കൂ‌ട്ടായ്മയുടെ (Free Software Community of India) പ്രസ്താവന: എലമെന്റ്‍, ബ്രയാര്‍ ആപ്പുകള്‍ പ്രചരിപ്പിയ്ക്കുകയാണു് വേണ്ടതു്

Thu, 11 May 2023 16:32:47 +0530

സ്വതന്ത്ര സോഫ്റ്റ്‍വെയറുകളായ എലമെന്റ്‍, ബ്രയാര്‍ ഉള്‍പ്പെടെ 14 ആപ്പുകള്‍ മെയ് 3 മുതല്‍ ഇന്ത്യയില്‍ നിരോധിച്ചതായി മാധ്യമങ്ങള്‍ വാര്‍ത്ത നല്‍കിയിട്ടുണ്ടു് ¹. “ഇന്ത്യയില്‍ ഈ ആപ്പുകള്‍ക്കു് പ്രതിനിധികളാരും ഇല്ലാത്തതുകൊണ്ടു് ഇന്ത്യയിലെ നിയമപ്രകാരം അവശ്യപ്പെടാവുന്ന വിവരങ്ങള്‍ക്കു് ബന്ധപ്പെടാനാകുന്നില്ല” എന്നാണു് ഇതിനു് കാരണമായി വാര്‍ത്തകളില്‍ നിന്ന് മനസ്സിലാവുന്നതു്. പൊതുവായുള്ള ഒരു പ്രോട്ടോകോള്‍ വഴി ഒന്നിച്ചു പ്രവര്‍ത്തിയ്ക്കുന്ന (federated) സേവനങ്ങളെപ്പറ്റിയുള്ള സര്‍ക്കാറിന്റെ ധാരണക്കുറവാണ് ഇതില്‍ നിന്നും മനസ്സിലാക്കാനാവുന്നത്. കൂടുതല്‍ വിവരങ്ങള്‍ താഴെ കുറിപ്പുകളായി കൊടുത്തിരിയ്ക്കുന്നു.

ഈ നിരോധനം എങ്ങിനെ നടപ്പിലാക്കും എന്നത് വ്യക്തമല്ല. ആപ്പ് സ്റ്റോറുകളില്‍ നിന്നും ഇവ ഒഴിവാക്കും എന്നാണു് ഞങ്ങള്‍ കരുതുന്നതു്.

എലമെന്റ് ആപ്പിന്റെ നിര്‍മാതാക്കളായ എലമെന്റ് അവരുടെ നിലപാട് വ്യക്തമാക്കിക്കൊണ്ടു് ഒരു പ്രസ്താവന ഇറയ്ക്കിയിട്ടുണ്ടു് ². ഇന്ത്യന്‍ ഗവര്‍ണ്‍മെന്റ് സംഘടനകള്‍ ആദ്യമായല്ല എലമെന്റിനെ സമീപിയ്ക്കുന്നതെന്നും, സമീപിച്ചപ്പോഴെല്ലാം കൃത്യമായി മറുപടി നല്കിയിട്ടുമുണ്ടെന്നും എലമെന്റ് പറയുന്നു. എന്നാല്‍ ഇങ്ങനൊരു നിരോധന ഉത്തരവിന്റെ പകര്‍പ്പോ സുചനയോ എലമെന്റിനു ഇതുവരെ ലഭിയ്ക്കുകയുണ്ടായിട്ടില്ല.

എലമെന്റ് ഒരിയ്ക്കലും എന്‍‍ഡ്-റ്റു-എന്‍ഡ് എന്‍ക്രിപ്ഷനിലോ (end-to-end encryption) സ്വകാര്യതയിലോ വിട്ടുവീഴ്ച ചെയ്യില്ലെങ്കിലും, ഇന്ത്യയിലെ ഏജന്‍സികള്‍ മുമ്പു് ഞങ്ങളെ ബന്ധപ്പെടുകയും ഞങ്ങള്‍ അവർക്ക് ക്രിയാത്മകമായി മറുപടി നല്‍കുകയും ചെയ്തിട്ടുണ്ടു് (സാധാരണയായി അതേ ദിവസം തന്നെ മറുപടി നല്‍കിയിട്ടുണ്ടു്).

ഇന്ത്യയില്‍ പ്രതിനിധികള്‍ ഇല്ലാത്തതിനാലാണു് എലമെന്റ് (മറ്റു് ആപ്പുകളുടേയും) നിരോധനം ഇന്ത്യന്‍ അധികാരികള്‍ അംഗീകരിച്ചതെന്നാണു് ഞങ്ങള്‍ മനസ്സിലാക്കുന്നതു്.

ഇതു് നമ്മള്‍ ഊഹിച്ചെടുക്കുന്നതാണു്, കാരണം ഈ തിരുമാനത്തെക്കുറിച്ചുള്ള മുൻകൂർ അറിയിപ്പുകളൊന്നും ഞങ്ങള്‍ക്ക് ലഭിച്ചിട്ടില്ല. ഇലക്ട്രോണിക്സിനും വിവര സാങ്കേതികവിദ്യയ്ക്കുമുള്ള മന്ത്രാലയത്തില്‍ നിന്നും വ്യക്തത വളരെ സ്വാഗതാര്‍ഹമായിരിക്കും.

പി-റ്റു-പി (P2P), ഫെഡറേറ്റഡ് ആപ്പുകള്‍ എങ്ങനെയാണു് പ്രവര്‍ത്തിയ്ക്കുന്നതെന്നു് മനസ്സിലാക്കുന്നതില്‍ സര്‍ക്കാരിനു് ധാരണക്കുറവുണ്ടെന്നാണു് ഞങ്ങള്‍ക്കു് തോന്നുന്നതു്. ഈ ആപ്പുകള്‍ ദുരന്ത സമയത്തുള്ള ആശയവിനിമയത്തിനു് വളരെയധികം ഉപകാരം ചെയ്തിട്ടുളളതും പോരാതെ ഓഫീസുകളിലെ നിരന്തരമായുളള പരസ്പരവിനിമയത്തിനുള്ള ഉപാധിയായി ഉപയോഗിക്കപ്പെടുന്നതുമാണ്.

ഈ നിരോധനം കൊണ്ടു് ഉദ്ദേശിയ്ക്കുന്ന ഫലമുണ്ടാവില്ല എന്നാണു് ഞങ്ങള്‍ വിശ്വസിയ്ക്കുന്നതു്, കാരണം തീവ്രവാദികള്‍ക്കു് ഇതിനു പകരം അജ്‍‍ഞാതമായി ഉപയോഗിയ്ക്കാവുന്ന നിരവധി ബദല്‍ മാര്‍ഗ്ഗങ്ങള്‍ ലഭ്യമാണു്.

എലമെന്റ്‍, ബ്രയാര്‍ തുടങ്ങിയ ഫെഡറേറ്റഡ്, പിയര്‍-റ്റു-പിയര്‍, എന്‍ക്രിപ്റ്റഡ്, സ്വതന്ത്ര സോഫ്റ്റ്‍വെയര്‍ ആപ്പുകള്‍/സോഫ്റ്റ്‍വെയറുകള്‍ പ്രചരിപ്പിയ്ക്കുകയാണു് വേണ്ടതു്. നമ്മുടെ പരമധികാരത്തിനകത്തു് നിന്നും സ്വകാര്യതയും സുരക്ഷയും ഉറപ്പാക്കി ഇന്ത്യയിലെ പൌരന്മാര്‍ക്കു് ആശയവിനിമയം സാധ്യമാക്കുന്ന നമ്മുടെ രാജ്യസുരക്ഷയുടെ കേന്ദ്രബിന്ദുവാണിവ. ഫ്രാൻസ് ³, ജർമ്മനി ⁴, സ്വീഡൻ ⁵ എന്നിവടങ്ങളിലെ സര്‍ക്കാരുകൾ എലമെന്റ് പ്രോത്സാഹിപ്പിയ്ക്കുന്നു എന്നത് ഇന്ത്യ മാതൃകയാക്കേണ്ട ഉദാഹരണമാണ്.

കുറിപ്പുകള്‍

ഈമെയിലും ഫെഡറേറ്റഡാണു്, വളരെ കാലമായി ഉപയോഗത്തിലുള്ളതുമാണു്, ഇവര്‍ എലമെന്റിനെ നിരോധിക്കാന്‍ പറഞ്ഞ അതേ യുക്തി സ്വതന്ത്ര സോഫ്റ്റ്‍വെയര്‍ ഈമെയില്‍ ആപ്പായ കെ9 മെയിലിനും ബാധകമാണു്. ഈമെയില്‍ സേവനം നല്‍കുന്ന ഗൂഗിള്‍, മൈക്രോസോഫ്റ്റ് എന്നീ കമ്പനികള്‍ക്ക് പുറമെ ഇന്ത്യയില്‍ പ്രതിനിധികളില്ലാത്ത പല സേവന ദാതാക്കളും ഉണ്ടു്. എലമെൻ്റ് ആപ്പിന്റെ സേവനത്തിനു് പുറകിലുള്ള പ്രോട്ടോക്കോളായ മാട്രിക്സും ഈമെയില്‍ പോലെ ഫെഡറേറ്റഡ് ആണു്. പല മെട്രിക്സ് ക്ലയന്റ് ആപ്പുകളില്‍ ഒന്നു് മാത്രമാണു് എലമെന്റ്, matrix.org ആവട്ടെ പല മെക്ട്രിക്സ് സേവനദാതാക്കളില്‍ ഒന്നു് മാത്രവും. എല്ലാ സേവനങ്ങളും, ആപ്പുകളും, മാട്രിക്സ് ഉപയോഗിക്കുന്ന എല്ലാ പ്ലാറ്റ്ഫോമുകളും നിരോധിക്കുന്നതു്, എല്ലാ ഈമെയില്‍ സേവന ദാതാക്കളെയും ആപ്പുകളേയും ഈമെയില്‍ ഇന്‍ഫ്രാസ്ട്രക്ചര്‍ മുഴുവനായും നിരോധിക്കുന്നതിനു് സമാനമായിരിയ്ക്കും, അതു് സര്‍ക്കാരിനു് അസാദ്ധ്യമായിരിയ്ക്കും, കുടാതെ വളരെ പെട്ടെന്നും എളുപ്പത്തിലും അതിനു് പകരമായി പുതിയ ആപ്പുകളും സേവനദാതാക്കളും പുറത്തിറങ്ങുകയും ചെയ്യും.

മാട്രിക്സ് ഫെഡറേറ്റഡാണെന്നു് പറയുന്നതു് പോലെ, ബ്രയാര്‍ പി-റ്റു-പി (പിയര്‍-ടു-പിയര്‍) ആപ്പായതിനാല്‍, ഇതില്‍ സേവനദാതാക്കളാരും തന്നെ ഇല്ല, ഇതില്‍ സന്ദേശം കൈമാറാന്‍ രണ്ടു് പേരും ഒരേ സമയം ഓണ്‍ലൈനായിരിക്കണം. ഇതിനു് ഇന്റര്‍നെറ്റ് കണക്ഷന്‍ പോലും ആവശ്യമില്ല, ബ്ലൂടുത്ത് വഴിയും വയര്‍ലെസ് നെറ്റ്‍വര്‍ക്ക് വഴിയും പ്രവര്‍ത്തിയ്ക്കും. പ്രകൃതി ദുരന്തം പോലെ മറ്റ് ആശയവിനിമയോപാധികള്‍ ലഭ്യമല്ലാത്ത സമയത്തു് ഇതു് സഹായകരമാണു്.

element.io എന്ന വെബ്സൈറ്റ് പല ഇന്റര്‍നെറ്റ് സേവന ദാതാക്കളും ബ്ലോക്ക് ചെയ്തതുകൊണ്ടു് അവയുടെ ആര്‍ക്കൈവ് ലിങ്കുകളാണു് താഴെ കൊടുത്തിരിയ്ക്കുന്നതു്.

അവലംബം

1: https://indianexpress.com/article/india/mobile-apps-blocked-jammu-kashmir-terrorists-8585046/

2: https://archive.is/IDNoe

3: https://archive.is/n7Oha

4: https://archive.is/Nialr

5: https://archive.is/EtTUO

കേരളത്തിലെ അധ്യാപകര്‍ക്കൊരു തുറന്ന കത്ത്

Mon, 30 Aug 2021 13:15:31 +0530

ഇന്ത്യയിലെ സ്വതന്ത്ര സോഫ്റ്റ്‌വെയർ കൂട്ടായ്മ എഴുതുന്നത്

സംഗ്രഹം

ഗൂഗിളിന്റെ ജി-സ്വീറ്റ് കേരളത്തിലെ വിദ്യാലയങ്ങള്‍ക്കു് സൗജന്യമായി നലകാനുള്ള വാഗ്ദാനം, അവർക്കു് ജി-സ്വീറ്റിനു കൂടുതൽ ഉപഭോക്താക്കളെ നേടാനും, അവരുടെ പരസ്യ, തിരച്ചിൽ കച്ചവടങ്ങളിലെ കുത്തക നിലനിർത്താനുമുള്ള പദ്ധതിയാണ്. ഗൂഗിളിന്റെ മേലുള്ള ആശ്രിതത്വം, എല്ലാവരും നിരീക്ഷിക്കപ്പെടാനും അതുമൂലമുണ്ടാകുന്ന പ്രതികരിക്കാനുള്ള പേടിയും (chilling effects), രാഷ്ട്രീയ തീരുമാനങ്ങളെടുക്കാനുള്ള കഴിവ് അടിയറവയ്ക്കുക പോലുള്ള ഗുരുതരമായ പരിണതഫലങ്ങൾക്കു കാരണമാകും. വിദ്യാഭ്യാസ സ്ഥാപനങ്ങളോട് ഈ വാഗ്ദാനം നിരസിക്കുവാനും, എല്ലാ പ്രവർത്തനങ്ങൾക്കും സ്വതന്ത്ര സോഫ്റ്റ്‍വെയറുകൾ ഉപയോഗിക്കാനും ഞങ്ങള്‍ ശുപാർശ ചെയുന്നു. നെറ്റ്‍വര്‍ക്ക് ആവശ്യമായിട്ടുള്ള സോഫ്റ്റ്‍വെയറുകള്‍ക്കു്, സ്വതന്ത്ര സോഫ്റ്റ്‌വെയർ അധിഷ്ഠിതമായ സേവനങ്ങൾ സെല്‍ഫ്-ഹോസ്റ്റ് ചെയ്യാനും ഞങ്ങള്‍ ശുപാർശ ചെയുന്നു. സെല്‍ഫ്-ഹോസ്റ്റിംഗും സ്വതന്ത്ര-സോഫ്റ്റ്‍വെയറും ഉപയോഗിക്കുന്നതു് വഴി സോഫ്റ്റ്‌വെയറും ഡാറ്റയും നിങ്ങളുടെ സ്ഥാപനത്തിന്റെ നിയന്ത്രണത്തിലായിരിക്കും.

ക്ലാസ്റൂമുകളില്‍ ജി-സ്വീറ്റ് ഉപയോഗിക്കുമെന്നു് കൈറ്റ് (KITE) പ്രഖ്യാപിച്ചു

കേരളത്തിലെ സ്കൂളുകളിലെ ക്ലാസ്റൂം പ്രവര്‍ത്തനങ്ങള്‍ക്കായി ജി-സ്വീറ്റ് പ്ലാറ്റ്ഫോം ഉപയോഗിച്ചു തുടങ്ങാന്‍ കേരള ഇന്‍ഫ്രാസ്ട്രക്ചര്‍ ആന്‍ഡ് ടെക്നോളജി ഫോര്‍ എഡ്യുക്കേഷന്‍ (കൈറ്റ്) തീരുമാനിച്ചതു് വളരെയധികം ദുഃഖകരമാണു്. ഗൂഗിള്‍ മീറ്റ്, ഗൂഗിള്‍ ഡ്രൈവ്, ജീമെയില്‍, ഗൂഗിള്‍ ഡോക്സ് തുടങ്ങിയ സേവനങ്ങള്‍ ഒരുമിച്ചു് ലഭിക്കുന്നതാണു് ജി-സ്വീറ്റ്. ഔദ്യോഗിക പ്രഖ്യാപനം ഇവിടെ.

സ്വകാര്യതയുടെ വാഗ്ദാനവും യാഥാര്‍ത്ഥ്യവും

കൈറ്റിന്റെ പ്രഖ്യാപനത്തില്‍ “വിദ്യാര്‍ത്ഥികളുടേയോ അധ്യാപകരുടേയോ സ്വകാര്യ വിവരങ്ങള്‍ പങ്കുവയ്ക്കുകയില്ല. പ്ലാറ്റ്ഫോമില്‍ അപ്‌ലോഡ് ചെയ്യുന്ന ഡാറ്റയില്‍ കൈറ്റിനു് പൂര്‍ണ്ണമായ നിയന്ത്രണം ഉണ്ടായിരിക്കും” എന്നു് പറഞ്ഞി‌ട്ടുണ്ടു്. എല്ലാ ഉപയോക്താക്കളുടേയും വളരെയധികം ഡാറ്റ ശേഖരിക്കുന്നതിനാല്‍ ഗൂഗിളിനു് അധ്യാപകരുടേയും വിദ്യാര്‍ത്ഥികളുടേയും ഐഡി മാറ്റിയാലും ശേഖരിച്ച ഡാറ്റ ഉപയോഗിച്ച് അവരെ തിരിച്ചറിയാന്‍ എളുപ്പത്തില്‍ സാധ്യമാകും.

ഗൂഗിള്‍ ക്രോസ്-സൈറ്റ് ട്രാക്കിങ്ങ് ഉപയോഗിക്കുന്നു: നിങ്ങള്‍ ഒരു സൈറ്റില്‍ നിന്നും മറ്റൊരു സൈറ്റിലേക്കു് മാറുമ്പോള്‍ നമ്മള്‍ സന്ദര്‍ശിക്കുന്ന സൈറ്റുകളില്‍ ഉള്ള ചെറിയ പ്രോഗ്രാമുകളും (scripts, widgets), കാണാനാവാത്ത ചെറിയ ചിത്രങ്ങളും (invisible embedded images) മറ്റും ഉപയോഗിച്ചു് നമ്മള്‍ ഏതൊക്കെ സൈറ്റുകള്‍ സന്ദര്‍ശിച്ചു, നമ്മള്‍ ആ സൈറ്റുകളില്‍ എന്തൊക്കെ ചെയ്തു തുടങ്ങിയ വിവരങ്ങള്‍ ശേഖരിക്കപ്പെടുന്നുണ്ടു്. ഇതിനുള്ള ഒരു നല്ല ഉദാഹരണമാണു് പല സൈറ്റുകളിലും കാണുന്ന മറ്റു് സേവനങ്ങളുമായി (ഫേസ്ബുക്ക്, ഇൻസ്റ്റാഗ്രാം) വിവരങ്ങൾ പങ്കിടാനുള്ള ബട്ടണുകള്‍. സൈറ്റില്‍ എത്ര പേര്‍ വന്നു മുതലായ കാര്യങ്ങള്‍ അറിയാനും ഇതു് പോലുള്ള ബട്ടണുകള്‍ ചിലപ്പോൾ സഹായിക്കും , പക്ഷേ അവ ഈ സാമുഹിക പ്ലാറ്റ്ഫോമുകളിലേക്കു് നമ്മുടെ ഡാറ്റയും കൊടുക്കുന്നു. അവ നിങ്ങള്‍ക്കു് വിവരങ്ങള്‍ മറ്റു് സാമൂഹിക സേവനങ്ങളില്‍ പങ്കു് വയ്ക്കാന്‍ സഹായകരമായേക്കാം, പക്ഷേ പലപ്പോഴും ഈ വിവരങ്ങള്‍ നിങ്ങളെ ലക്ഷ്യമാക്കിയുള്ള പരസ്യങ്ങള്‍ നല്‍കാനോ നിങ്ങളുടെ പ്രൊഫൈലുണ്ടാക്കാനോ ആയിട്ടാണു് പിന്നണിയില്‍ ഉപയോഗിക്കപ്പെടാറുള്ളതു.

ഒരു വെബ്‍സൈറ്റ് സന്ദര്‍ശിക്കുന്ന ഉപയോക്താക്കളുടെ വിവരങ്ങൾ ശേഖരിച്ചു അതു സൈറ്റിന്റെ ഉടമസ്ഥരെ അറിയിക്കാനുള്ള ഒരു സേവനമാണു് ഗൂഗിള്‍ അനലിറ്റിക്സ്. ഇതു് തടയാന്‍ ഉപയോക്താക്കള്‍ക്കു് യുബ്ലോക്ക്-ഒറിജിന്‍ (ublock-origin) പോലുള്ള അധിക സുരക്ഷാസംവിധാനങ്ങൾ അവരുടെ ബ്രൌസറുകളില്‍ ഉപയോഗിക്കേണ്ടി വരും. ജി-സ്വീറ്റിൽ ഗൂഗിൾ അനലിറ്റിക്സ് ഓഫ് ചെയ്യാൻ കഴിയുമോ എന്ന് കൈറ്റിനോടു് ചോദിക്കാൻ ഇത് നമ്മെ പ്രേരിപ്പിക്കുന്നു.

കേബിള്‍ ടിവിയില്‍ കാണുന്ന പരസ്യങ്ങളില്‍ നിന്നും ഗൂഗിള്‍ കാണിക്കുന്ന പരസ്യങ്ങള്‍ എങ്ങനെ വ്യത്യാസപ്പെട്ടിരിക്കുന്നു?

ടിവിയിലോ റേഡിയോയിലോ കാണുന്ന പരസ്യങ്ങളിൽ നിന്നും അടിസ്ഥാനപരമായി വളരെ വ്യത്യസ്ഥമാണു് ഗൂഗിള്‍ പരസ്യങ്ങള്‍ കാണിക്കുന്ന രീതി. ഉപയോക്താക്കളുടെ സ്വകാര്യ വിവരങ്ങള്‍ ഉപയോഗിച്ചു് അവരുടെ താത്‌പര്യങ്ങൾ ലക്ഷ്യമാക്കിയുള്ള പരസ്യങ്ങളാണു് ഗൂഗിള്‍ കാണിക്കുന്നതു്. എന്നാല്‍ ടിവിയിലോ റേഡിയോയിലോ പത്രങ്ങളിലോ കാണിക്കുന്ന പരസ്യം ആരുടേയും സ്വകാര്യ വിവരങ്ങള്‍ ഉപയോഗിച്ചുള്ളതല്ല. ഒരു പത്രം വായിക്കുന്ന എല്ലാവരും, ഒരേ ചാനല്‍ ടിവിയില്‍ കാണുന്ന എല്ലാവരും ഒരേ പരസ്യം തന്നെയാണു് കാണുന്നതു്. എന്നാൽ ഗൂഗിള്‍ കാണിക്കുന്ന പരസ്യങ്ങള്‍ ഉപയോക്താക്കളുടെ മുന്‍കാല പ്രവൃത്തികള്‍, എന്തൊക്കെ വിവരങ്ങള്‍ തിരഞ്ഞിട്ടുണ്ടു്, ഏതൊക്കെ പേജുകള്‍ സന്ദര്‍ശിച്ചിട്ടുണ്ടു് എന്നതിനെ അടിസ്ഥാനമാക്കി ഉള്ളതായതിനാല്‍ ഉപയോക്താക്കളെ വലയില്‍ വീഴ്ത്താന്‍ കൂടുതല്‍ പര്യാപ്‌തമാണു്.

ഗൂഗിളിന്റെ ഈ വാഗ്ദാനം കൂടുതല്‍ ഉപയോക്താക്കളെ (അവര്‍ക്കു് പരസ്യം ലക്ഷ്യം വെക്കാവുന്ന കുടുങ്ങിപ്പോയ കാഴ്ചക്കാര്‍) കിട്ടാനുള്ള ഒരു പദ്ധതിയാണു്. ഇതിലൂടെ വിദ്യാർത്ഥികളുടെ വളരെയധികം വിവരങ്ങള്‍ ഗൂഗിളിന്റെ കയ്യിലെത്തും. പരസ്യ വ്യവസായത്തിലെ ഗൂഗിളിന്റെ അധീശത്വം ഊട്ടിയുറപ്പിക്കാന്‍ ഇതു് സഹായകമാകും. അവരുടെ അധീശത്വം എതിരാളികളെ ഇല്ലാതാക്കാന്‍ അവര്‍ ഇപ്പോള്‍ തന്നെ ഉപയോഗിക്കുന്നുണ്ടു്. പരസ്യങ്ങളിലൂടെ ഉപയോക്താക്കളിൽ അവിഹിതമായ സ്വാധീനം ചെലുത്തുവാന്‍ ഗൂഗിളിനു് കഴിയും. ഗൂഗിളിനെപ്പോലെ ഇത്രയും ഡാറ്റ കൈവശമുള്ള കമ്പനിക്കു് തിരഞ്ഞെടുപ്പുകളെ പോലും സ്വാധീനിക്കാന്‍ കഴിയും. ഉദാഹരണത്തിനു് ഫേസ്‍ബുക്കിന്റെ കയ്യിലുള്ള ഡാറ്റ ഉപയോഗിച്ചാണു് കുറച്ച് വര്‍ഷങ്ങള്‍ക്കു് മുമ്പു് കേംബ്രിഡ്ജ് അനലിറ്റിക്ക തിരഞ്ഞെടുപ്പിനെ സ്വാധീനിച്ചതു്. ഉദാഹരണത്തിനു്, ഗൂഗിളിന്റെ തിരയല്‍ സംവിധാനത്തിനു് അവരുടെ താൽപര്യങ്ങളുമായി യോജിക്കുന്ന ആളുകളുടെ അഭിപ്രായങ്ങള്‍ കൂടുതല്‍ പേരെ കാണിക്കാനും വിയോജിക്കുന്ന ആളുകളുടെ അഭിപ്രായം കറച്ചു് ആളുകളെ മാത്രം കാണിക്കാനും കഴിയും.

ഗൂഗിള്‍ എന്തുകൊണ്ട് സേവനങ്ങള്‍ സൌജന്യമായി നല്‍കുന്നു?

ഗൂഗിള്‍ ഇതു സൌജന്യമായി നല്‍കുന്നതു് ആദ്യ കാലത്തു് ജിയോ സൌജന്യമായി ഇന്റര്‍നെറ്റ് കണക്ഷന്‍ തരുകയും പിന്നീടു് പണം വാങ്ങിത്തുടങ്ങുകയും ചെയ്യുന്നതിനു് സമാനമാണു്. ജിയോയുടെ ഓഫര്‍ കാരണം വൊഡാഫോണും ഐഡിയയും പിടിച്ചു് നില്‍ക്കാനാവാതെ ഒരു കമ്പനിയാകേണ്ടി വരുകയും നമ്മുടെ മൊബൈല്‍ സേവന ദാതാക്കളുടെ എണ്ണം കുറയുകയും ചെയ്തു. ഗൂഗിളിന്റെ സേവനങ്ങള്‍ എല്ലാ കാലവും സൌജന്യമായിരിക്കും എന്നതിനു് ഒരു ഉറപ്പും ഇല്ല. അവരുടെ വിദ്യാഭ്യാസ സേവനങ്ങളുടേയോ വീഡിയോ കോണ്‍ഫറന്‍സ് സേവനങ്ങളുടേയോ കുത്തക ഉപയോഗിച്ച് സൂം പോലുള്ള എതിരാളികളെ തകര്‍ക്കാനും പിന്നീട് തോന്നും പോലെ വില ഈടാക്കാനും സാധ്യതയുണ്ടു്. സൂം, ഞങ്ങള്‍ പിന്തുണയ്ക്കാത്ത മറ്റൊരു കുത്തക സോഫ്റ്റ്‌വെയർ, ഇവിടെ ഉദാഹരണമായി പറഞ്ഞതാണു്.

എല്ലാവരും നിരീക്ഷിക്കപ്പെടുമ്പോള്‍

എല്ലാവരും നിരീക്ഷിക്കപ്പെടുമ്പോള്‍ സമൂഹത്തിനും ഓരോ വ്യക്തിയിലും ദൂഷ്യഫലങ്ങൾക്കു് കാരണമാകുന്നു. നമ്മുടെ രാഷ്ട്രീയ സ്വാതന്ത്ര്യവും, ആവിഷ്കാര സ്വാതന്ത്ര്യവും, സ്വകാര്യതയും, സുരക്ഷയും, സാമൂഹിക സമത്വവും ഇവിടെ അപകടത്തിലാകും.

ഉദ്ദേശശുദ്ധി ഉണ്ടെങ്കിലും പ്രധാനപ്പെട്ട വിഷയങ്ങളിൽപ്പോലും ചോദ്യങ്ങള്‍ ചോദിക്കാനോ അതിനെപ്പറ്റി ഇൻർനെറ്റിൽ തിരയാനോ ഭയക്കുന്ന ഒരു സമൂഹം സൃഷ്ടിക്കപ്പെടാൻ, സ്വകാര്യത നഷ്ടമാകുന്നതു് കാരണമാകുന്നുവെന്നു് കണക്കുകള്‍ സൂചിപ്പിക്കുന്നു..

എല്ലാവരും നിരീക്ഷിക്കപ്പെടുമ്പോള്‍ നമ്മുടെ മാനസിക ആരോഗ്യത്തെ അതു് ബാധിക്കുന്നു. ഇതില്‍ ഉറക്കമില്ലായ്മ, സാമൂഹിക ആശങ്ക, വിഷാദം, ശ്രദ്ധക്കൂടുതല്‍, ചില സന്ദര്‍ഭങ്ങളെപ്പറ്റിയുള്ള പേടികൾ, ദുരനുഭവത്തിനു് ശേഷമുള്ള സമ്മര്‍ദ്ദരോഗം (PTSD), തുറസ്സായ സ്ഥലങ്ങളെക്കുറിച്ചുള്ള അകാരണ ഭയം, ചില കാര്യങ്ങൾ എത്ര ചെയ്താലും മതിവരാതെ പിന്നെയും പിന്നെയും ചെയുക (OCD) കൂടാതെ മറ്റു് പല പ്രശനങ്ങളും ഉൾപ്പെടുന്നു. നിരീക്ഷണ സമയത്തു നമ്മള്‍ തെറ്റൊന്നും ചെയ്തില്ലെങ്കിലും, അത് അധികാരികളുടെ അധികാരദുർവിനിയോഗത്തിനു് സാദ്ധ്യത കൂട്ടുന്നു.

എല്ലാവരും നിരീക്ഷണത്തിലാകുമ്പോള്‍ സംഭവിക്കുന്ന പ്രശ്നങ്ങളെക്കുറിച്ചുള്ള ‘പ്രതികരണശേഷിയില്ലാസമൂഹം’ (Social Cooling) എന്ന വെബ്‍സൈറ്റില്‍ നിന്നുള്ള ചില പ്രസക്ത ഭാഗങ്ങള്‍ താഴെ കൊടുത്തിരിക്കുന്നു:

“നിങ്ങള്‍ നിരീക്ഷണത്തിലാണെന്നു് തോന്നിയാല്‍ നിങ്ങള്‍ നിങ്ങളുടെ പെരുമാറ്റത്തി‍ല്‍ മാറ്റം വരുത്തും”. നിങ്ങള്‍ക്കു് ധീരമായ തീരുമാനങ്ങൾ എടുക്കാനുള്ള ആഗ്രഹം കുറയുകയോ, നിങ്ങൾ ആവിഷ്കാര സ്വാതന്ത്ര്യം ഉപയോഗിക്കാതിരിക്കുകയോ ചെയ്യാം. ദീര്‍ഘകാലാടിസ്ഥാനത്തില്‍ ഈ പ്രതികരിക്കാനുള്ള പേടി (chilling effects) സമൂഹത്തെ ‘തണുപ്പിച്ചേക്കാം’ (cool down). മാര്‍ക്കിടുന്ന സംവിധാനങ്ങള്‍ ആവശ്യമില്ലാത്ത പ്രോത്സാഹനങ്ങങ്ങൾ നൽകുകയും, സാധാരണ (കുറഞ്ഞ) നിലവാരവുമായി ചേരാനുള്ള സമ്മര്‍ദം ചെലുത്തകുകയും ചെയ്യാം. വളരെ മോശം അവസ്ഥയിലെത്തിയ കാന്‍സര്‍ രോഗികളെ ചികിത്സിക്കാന്‍ തയ്യാറായ ഡോക്റ്റര്‍മാര്‍ക്കു് രോഗികളുടെ മരണ നിരക്ക് കൂടുതലായിരുന്നു, അതു് അവരുടെ മാര്‍ക്ക് കുറച്ചു. രോഗികളെ സഹായിക്കാന്‍ താത്പര്യം കാണിക്കാത്ത ഡോക്റ്റര്‍മാരുടെ രോഗികള്‍ നേരത്തെ തന്നെ മരിച്ചെങ്കിലും, അവർക്കു് മാര്‍ക്ക് കൂടുതലായിരുന്നു.
ഈ ‘ഡിജിറ്റല്‍ സല്‍പ്പേരു്’ അവസരങ്ങള്‍ കുറയ്ക്കുമെന്നു് ആളുകള്‍ മനസ്സിലാക്കിത്തുടങ്ങിയിരിക്കുന്നു.
നിങ്ങളൊരു പോസിറ്റീവ് ആളാണെന്നു് നിങ്ങളെക്കുറിച്ച് ശേഖരിച്ച ഡാറ്റ സൂചിപ്പിക്കുന്നില്ലെങ്കിൽ നിങ്ങള്‍ക്കു് നിങ്ങളാഗ്രഹിച്ച ജോലി കിട്ടാതിരിക്കാം.
കൂടുതല്‍ ശമ്പളമുള്ള ജോലികളുടെ പരസ്യങ്ങള്‍ കുറച്ചു മാത്രമേ സ്ത്രീകളെ കാണിക്കുയുള്ളു.
സാമൂഹ്യ മാധ്യമങ്ങളില്‍ നിങ്ങള്‍ക്കു് “മോശം സുഹൃത്തുകളുണ്ടെങ്കില്‍” നിങ്ങളുടെ വായ്പയ്ക്കു് കൂടുതല്‍ പണം തിരിച്ചടക്കേണ്ടി വന്നേക്കാം.
നിങ്ങള്‍ ആകര്‍ഷകരായവരല്ലെങ്കില്‍ ടിന്ററിന്റെ (Tinder) അല്‍ഗോരിതങ്ങള്‍ ആകര്‍ഷകരായ ആളുകളെ നിങ്ങള്‍ക്കു് നിര്‍ദ്ദേശിക്കില്ല.
നിങ്ങള്‍ പലപ്പോഴും സാധനങ്ങള്‍ കടയിൽ തിരിച്ചു് കൊടുക്കുന്നവരാണെങ്കില്‍ ഈ വിവരം നിങ്ങള്‍ക്കെതിരെ ഉപയോഗിച്ചെന്നു് വരാം.
നിങ്ങള്‍ സമൂഹമാധ്യമങ്ങളില്‍ പങ്കുവെയ്ക്കുന്ന കാര്യങ്ങള്‍ നിങ്ങള്‍ക്കു് നികുതി വകുപ്പിന്റെ പരിശോധനയ്ക്കുള്ള സാധ്യത കൂട്ടാം. -നിങ്ങളുടെ ആരോഗ്യ ഇന്‍ഷൂറന്‍സ് ദാതാവു് നിങ്ങളുടെ ജീവിതശൈലി, വംശം തുടങ്ങിയ സ്വകാര്യമായ പല വിവരങ്ങളും ശേഖരിച്ചേക്കാം.

എന്താണ് പ്രതിവിധി?

നമ്മള്‍ ഉപയോഗിക്കുന്ന സോഫ്റ്റ്‍വെയര്‍ നമ്മളുടെ നിയന്ത്രണത്തിലായിരിക്കണം. ഉപയോക്താക്കള്‍ക്കു് ഉപയോഗിക്കാനും, പഠിക്കാനും, മാറ്റം വരുത്താനും, പങ്കുവയ്ക്കാനും സ്വാതന്ത്ര്യമുള്ള സോഫ്റ്റ്‍വെയറാണു് സ്വതന്ത്ര സോഫ്റ്റ്‍വെയര്‍. ഇംഗ്ലീഷില്‍ ‘ഫ്രീ സോഫ്റ്റ്‍വെയര്‍’ എന്നു് പറയുമ്പോള്‍ ‘ഫ്രീ’ എന്ന വാക്കു് കൊണ്ടുദ്ദേശിക്കുന്നതു് സ്വാതന്ത്ര്യമാണു്, സൌജന്യമല്ല. ഫയർഫോക്സ്, വി. എൽ. സി., തണ്ടർബേർഡ്, ഉബണ്ടു എന്നിവ സ്വതന്ത്ര സോഫ്റ്റ്‌വെയർ ഉദാഹരണങ്ങൾ ആണു്. ഒരു സോഫ്റ്റ്‌വെയർ മേൽപ്പറഞ്ഞ സ്വാതന്ത്രം ഉപയോക്താക്കൾക്കു് നല്കുന്നില്ലെങ്കിൽ അതിനെ പ്രൊപ്രൈറ്ററി അഥവാ കുത്തക സോഫ്റ്റ്‍വെയര്‍ എന്ന് വിളിക്കുന്നു. വാട്സ്ആപ്പ്, മൈക്രോസോഫ്റ്റ് വിൻഡോസ്, ഗൂഗിൾ മീറ്റ്, അഡോബി റീഡർ മുതലായവ ഉദാഹരണങ്ങൾ.

ഇന്റര്‍നെറ്റ് അടിസ്ഥാനമാക്കിയുള്ള, വീഡിയോ കോണ്‍ഫറന്‍സ്, ഓണ്‍ലൈന്‍ ഫയല്‍ സംഭരണം, ഈ-മെയില്‍ തുടങ്ങിയ സേവനങ്ങള്‍ ഉപയോക്താക്കള്‍ക്കു് (ഇവിടെ കൈറ്റിനോ കേരള സര്‍ക്കാരിനോ) സ്വന്തം സെര്‍വറില്‍ ഇതേ സേവനങ്ങള്‍ കൊടുക്കാന്‍ സാധിക്കണം. സെല്‍ഫ്-ഹോസ്റ്റിംഗ് എന്നു് പറയുന്ന ഈ സംവിധാനത്തിലൂടെ ഉപയോക്താക്കള്‍ സോഫ്റ്റ്‍വെയറിലും ഡാറ്റയിലുമുള്ള അവരുടെ നിയന്ത്രണം ഉറപ്പു് വരുത്തുന്നു. ഇതിലേതെങ്കിലും സ്വാതന്ത്ര്യം ഇല്ലെങ്കില്‍ നമ്മളതിനെ കുത്തക സോഫ്റ്റ്‍വെയര്‍ എന്നു് വിളിക്കുന്നു. ഇവ ഉപയോഗിക്കുമ്പോൾ നമ്മള്‍ ആ സോഫ്റ്റ്‍വെയര്‍ ഡെവലപ്പറുടെ ദയ കാത്തുനില്‍ക്കണം. ഉദാഹരണത്തിന്, ജി-സ്വീറ്റ് ഉപയോഗിക്കുമ്പോൾ നമ്മള്‍ ഗൂഗിളിന്റെ ആശ്രയത്തിലാണ്.

ഉദാഹരണത്തിനു് ബ്രിട്ടീഷ് ഈസ്റ്റ് ഇന്ത്യ കമ്പനി റെയില്‍വേ ട്രാക്കുകൾ, റോഡുകള്‍, പാലങ്ങള്‍ മുതലായവ സൌജന്യമായി നിര്‍മിച്ചു, അതിനു് ശേഷം നടന്ന കാര്യങ്ങള്‍ പ്രത്യേകിച്ചു് പറയേണ്ടതില്ലല്ലോ. ആശ്രിതത്വം സാധാരണയായി അടിമത്തത്തിലോ ചൂഷണത്തിലോ ആണ് അവസാനിക്കുക.

പ്രോഗ്രാമ്മര്‍മാരല്ലാത്തവര്‍ക്കു് പഠിക്കാനും മാറ്റം വരുത്താനുമുള്ള സ്വാതന്ത്ര്യം കൊണ്ടു് എന്താണു് ഗുണം എന്നു് ആളുകള്‍ പൌതുവെ ചിന്തിക്കാറുണ്ടു്. നമ്മളെപ്പോഴും ഇതുപോലുള്ള സ്വാതന്ത്ര്യം ഉപയോഗപ്പെടുത്താറുള്ളതാണു്, ഉദാഹരണത്തിനു്, ഒരു പ്ലമ്പറെ വിളിച്ചു് നമ്മള്‍ ടാപ്പുകള്‍ ശരിയാക്കുന്നു, ഇലക്ട്രീഷ്യനെ വിളിച്ചു് വൈദ്യുതി പ്രശ്നങ്ങള്‍ ശരിയാക്കുന്നു. ഇതുപോലെ തന്നെ ഒരാള്‍ക്കോ കുറേയാളുകള്‍ ചേര്‍ന്നോ (ഉദാഹരണത്തിനു് കൈറ്റിനോ കേരള സര്‍ക്കാറിനോ) ഇ‍ന്‍ഫോസിസ്, വിപ്രോ തുടങ്ങിയ കമ്പനികളുടെ സഹായത്തോടെയോ നമുക്കു് സോഫ്റ്റ്‍വെയറിലെ തകരാറുകള്‍ പരിഹരിക്കാനോ മാറ്റങ്ങൾ വരുത്താനോ കഴിയണം.

ജി-സ്വീറ്റ് എന്ന കൂട്ടം സോഫ്റ്റുവെയറുകള്‍ സ്വതന്ത്ര സോഫ്റ്റുവെയര്‍ അല്ല. അതുകൊണ്ടു തന്നെ അതുപയോഗിക്കുന്നവര്‍ക്കു് അതിന്റെ പ്രവര്‍ത്തനത്തെ നിയന്ത്രിക്കാനാവില്ല. വിദ്യാഭ്യാസ സ്ഥാപനങ്ങള്‍ സ്വതന്ത്ര സോഫ്റ്റുവെയര്‍ തന്നെ ഉപയോഗിക്കണം.

കേരളത്തിലെ ഇരുമ്പനം വി. എച്ച്. എസ്സ്. എസ്സ്. വിദ്യാലയത്തിലെ 6ലും 7ലും പഠിക്കുന്ന വിദ്യാര്‍ഥികള്‍ ടക്സ് പെയിന്റ് എന്ന സോഫ്റ്റ്‌വെയർ പൂർണ്ണമായും മലയാളത്തിലേക്ക് പരിഭാഷപ്പെടുത്തി, അതിലേക്കു നാട്ടിലെ പൂക്കളുടെ ചിത്രങ്ങളും, അവയുടെ പേരുകളുടെ ഉച്ചാരണങ്ങളുടെ ശബ്ദലേഖനങ്ങളും ചേർത്തു. ഇതിലൂടെ ഈ സോഫ്റ്റുവെയര്‍ പ്രവര്‍ത്തിക്കുന്നതെങ്ങനെയെന്നു് പഠിക്കാനും സോഫ്റ്റുവെയറിൽ മാറ്റം വരുത്താനുമുള്ള സ്വാതന്ത്ര്യം അവർ ഉപയോഗിച്ചു. ഒരു പ്രോഗ്രാമ്മർ അല്ലാത്തവർക്കോ കുട്ടികള്‍ക്കോ പോലും സോഫ്റ്റ്‍വെയര്‍ സ്വാതന്ത്ര്യം ഉണ്ടെങ്കില്‍ സോഫ്റ്റ്‌വെയർ മെച്ചപ്പെടുത്താന്‍ കഴിയുമെന്നു് ഇത് തെളിയിക്കുന്നു.

അഡോബി പേജ്മേക്കര്‍, ഇന്‍ഡിസൈന്‍ എന്നിവക്കു് ബദലായി ഉപയോഗിക്കുന്ന സ്ക്രൈബസ് എന്ന ഡെസ്ക്‍ടോപ്പ് പബ്ലിഷിംഗ് സോഫ്റ്റ്‍വെയറില്‍ ആദ്യ കാലത്തു് ഇംഗ്ലീഷ്, ഫ്രഞ്ച്, ജ‍ര്‍മ്മന്‍ പോലുള്ള ലാറ്റിന്‍ ലിപികൾ മാത്രമേ ഉപയോഗിക്കാന്‍ പറ്റിയിരുന്നുള്ളൂ. ഒമാന്‍ സ‍ര്‍ക്കാറിന്റെ സാമ്പത്തിക സഹായത്തോടെ, ഹോസ്റ്റ്- ഒമാന്‍ (House of Open Source Technologies - Oman) എന്ന സംരംഭത്തിന്റെ ഭാഗമായിരുന്ന ഡെവലപ്പര്‍മാരാണു് മറ്റുള്ള ഭാഷകള്‍ക്കു് വേണ്ട പിന്തുണ (Complex Text Layout) സ്ക്രൈബസില്‍ ചേര്‍ത്തതു്. ഇതിലൂടെ മലയാളത്തിലും സ്ക്രൈബസ് ഉപയോഗിക്കാന്‍ സാധ്യമായി. ഒരാള്‍ നേരിട്ട് സോഫ്റ്റ്‍വെയര്‍ മാറ്റം വരുത്തുന്നില്ല എങ്കില്‍ കൂടി മറ്റുള്ളവര്‍ വരുത്തുന്ന മാറ്റങ്ങള്‍ എല്ലാവര്‍ക്കും ഉപകാരപ്പെടും എന്നു് നമുക്കിതിലൂടെ മനസ്സിലാക്കാം. ഇതു് ജനയുഗം, ദേശാഭിമാനി പത്രങ്ങൾ 100% സ്വതന്ത്ര സോഫ്റ്റ്‍വെയര്‍ ഉപയോഗിച്ചു് പ്രസിദ്ധീകരിക്കാന്‍ സഹായകമായി.

പകരം ഉപയോഗിക്കാവുന്ന സോഫ്റ്റുവെയറുകള്‍

താഴെപ്പറയുന്ന സ്വതന്ത്ര സോഫ്റ്റ്‍വെയറുകള്‍ ക്ലാസ്റുമുകളില്‍ ഇപ്പോഴുപയോഗിക്കുന്ന കുത്തക സോഫ്റ്റ്‍വെയറുകള്‍ക്കു് പകരം ഉപയോഗിക്കാവുന്നതാണു്:

ഓപ്പറേറ്റിങ്ങ് സിസ്റ്റം: ഗ്നു/ലിനക്സ് വിതരണങ്ങളായ ഡെബിയന്‍, ഉബുണ്ടു് തുടങ്ങിയവ
ഓണ്‍ലൈന്‍ ക്ലാസുകള്‍: ജിറ്റ്സി, ബിഗ് ബ്ലൂ ബട്ടണ്‍
ഇ‍ന്‍സ്റ്റന്റ് മെസഞ്ചര്‍: എലമെന്റ്, ക്വിക്സി, കോണ്‍വര്‍സേഷന്‍സ്
വീഡിയോ അപ്‍ലോഡ് ചെയ്യാന്‍: പിയ‍ര്‍ട്യൂബ്
ഈ-ലേണിംഗ് പ്ലാറ്റ്ഫോം: മൂഡില്‍, ബിബിബി
ക്ലാസുകള്‍ റെക്കോര്‍ഡ് ചെയ്യാന്‍: ഒബിഎസ്
കുറിപ്പുകള്‍ പങ്കുവെയ്ക്കാന്‍: നെക്സ്റ്റ്ക്ലൌഡ്, ലുഫി
ഡിജിറ്റൽ റൈറ്റിംഗ് പാഡ്: Xournal
ഡോക്യുമെന്റ് എഡിറ്റർ : LibreOffice, Cryptpad, Etherpad, EtherCalc, OnlyOffice
സർവേ/ഡാറ്റ ശേഖരണം: KoBoToolbox, NextCloud Forms (ഡിസ്‌റൂട്ടിന്റെ NextCloud സേവനം ലഭ്യമാണ്)

ഈ പോരാട്ടത്തില്‍ അണിചേരൂ

കേരളത്തിലെ അധ്യാപകര്‍ എങ്ങിനെ സോഫ്റ്റ്‍വെയര്‍ സ്വാതന്ത്ര്യത്തിനു് വേണ്ടി നിലകൊള്ളുകയും ലോകത്തിനാകെ മാതൃകയാകുകയും ചെയ്തു എന്നതു് നിങ്ങളെ ഓര്‍മ്മപ്പെടുത്താന്‍ ഞങ്ങളാഗ്രഹിക്കുന്നു. അവർ ഇന്റലിന്റേയും മൈക്രോസോഫ്റ്റിന്റേയും സൌജന്യ പരിശീലന വാഗ്ദാനങ്ങളെ തള്ളിക്കളയുകയും ക്ലാസെടുക്കാന്‍ ആവശ്യമുള്ള സോഫ്റ്റ്‍വെയറുകള്‍ ഉള്‍പ്പെടുത്തി സ്വന്തമായി ഒരു ഗ്നു/ലിനക്സ് വിതരണം ഉണ്ടാക്കുകയും, കേരളം മുഴുവനുമുള്ള അധ്യാപകര്‍ക്കു് സാങ്കേതിക പിന്തുണയും പരിശീലനവും നല്‍കുകയും ചെയ്തു. ഈ മാറുന്ന സാഹചര്യങ്ങളിലും നിങ്ങൾക്കു ഇതു ആവര്‍ത്തിക്കാനും ലോകത്തിനു് വീണ്ടും മാതൃകയാകാനും കഴിയും. കൈറ്റിനോടു് സംസാരിച്ചു, ഓണ്‍ലൈന്‍ ക്ലാസുകള്‍ക്കു് സ്വതന്ത്ര സോഫ്റ്റ്‍വെയര്‍ അടിസ്ഥാനമാക്കിയ പ്ലാറ്റ്ഫോമുകള്‍ ലഭ്യമാക്കാനുള്ള ഈ പ്രയത്നത്തില്‍ കൂടെ ചേരാൻ ഞങ്ങള്‍ നിങ്ങളെ ക്ഷണിക്കുന്നു.

ഈ പ്രയത്നത്തെ അനുകൂലിക്കുന്നുവെങ്കില്‍, ദയവായി ഇവിടെ നിങ്ങളുടെ പേരു് ചേര്‍ക്കുക:

വിദ്യാഭ്യാസ കാര്യങ്ങള്‍ക്കു് സ്വതന്ത്ര സോഫ്റ്റ്‍വെയര്‍ ഉപയോഗിക്കുന്നതിനു് എന്തെങ്കിലും സാങ്കേതികമായ സഹായം ആവശ്യമുണ്ടെങ്കില്‍, ഞങ്ങളുമായി ബന്ധപ്പെടാന്‍ മടിയ്ക്കേണ്ട .

അവസാനം പുതുക്കിയത് October 30, 2021

ഒപ്പിട്ടവർ

കേരളത്തിലെ അധ്യാപകർ

A K Francis
Shameel Abdulla
Anitha.C.K
Jobin

കേരളം ഒന്ന് മാറി ചിന്തിക്കട്ടെ!

കേരളത്തിനു പുറത്തുനിന്നുള്ള അധ്യാപകർ

Snehal Shekatkar

The educational entities need to realize that the convenience they seem to be getting through the use of proprietary software like g-suite comes at a huge cost. We have a collective responsibility to stand for our digital freedom. Use only freedom respecting software when you teach students.

Benjamin Slade

മറ്റുള്ളവർ

Vivek K J
Rahul Raj
Amal Vinod
Shrini
Nithin C
ബിജീഷ് മോഹൻ റ്റി

സൗജന്യവും സ്വതന്ത്രവുമായ സോഫ്റ്റ്‌വെയറുകൾ തന്നെ കഴിവതും ഉപയോഗിക്കുക.

Ajose Joseph
Mujeeb Rahman K

kerala schools already using foss. dont go back to proprietary solutions. i can help with any kind of training

Amrithanath

“Free software and its philosophy should taught to every students regardless of their subjects. Philosophy of FLOSS is such a great one and learning it not only help them to create better software which respects the user but also hopefully enables them to create a better society which respects evryone and shares everything, participate in activities etc. But using proprietary closed source software which doesn’t care about users and only treat them as product shouldn’t be the main mode communication they should have”

Madhav V

“KITE has all the capability to implement a free at the same time efficient e-learning platform using existing technologies. If they do so, it will be a revolution. Please dont rely on freebies from big internet companies.”

Pranav K

There are lot of free and open source alternatives that can be used by the teachers and students for their privacy and security.

Abhishek

“great job guys , this is a great step you guys have taken . also consider teaching them kids about free softwares a bit”

George Martin Jose:

I support FOSS. FOSS FTW

Sajesh Cherian

Google doesn’t have our best interest at heart. When they provide their suite for free, it only serves to train people in how to use Google software and become a slave to their data collection practice. We can do better. Please reconsider your decision.

Julin

Going into the arms of google is easy, getting out of there would be much more difficult. Better not get entrapped.

Subin P T

A decision shouldn’t be rushed in to just because it is an easy option. Its drawbacks and the alternates should always be considered.

അഭിനവ് കൃഷ്ണ സി കെ
Jyothis Jagan
Abraham Raji

Education liberates people hence it only makes sense that educational institution should not use use tools that designed to implant dependence. Just as schools say no substance abuse they should say no to proprietary software.

Kailas E K
Dr. V. Sasi Kumar
Sheikh Shakil Akhtar
Aravind P Unnithan
മുരളി ഐ പി
സിജു
Harikrishnan A

This is a great cause in this age and I’m happy to help with any setup required.

Free software is the only way for schools and districts to be autonomous and ensure the rights of their students is respected. Students should not be subject to mass surveillance by Google and other tech giants just to get an education. Free software teaches students how to be independent and learn from others who have put in the work to solve hard problems. Furthermore, it puts the school in full control over their technology stack, which can be adapted and refined over time. Additionally, it can result in cost savings. G-Suite does none of the above and exists solely to mine data from students to fuel Google’s dominance. The public sector is paid for by citizens; this money should not fall into the hands of an unethical private entity.

Aman Das

KITE can and should self host the infrastructure using FOSS software. Education is a public service and should be based on public infrastructure. Also the CS curriculum should promote FOSS software.

Jinu Raju
Ranjith Siji
Roshan More

എഫ്. എസ്. സി. ഐ. ജിറ്റ്സി മീറ്റ് ജനകീയ സഹായനിധി ശേഖരണ പ്രചാരണം

Thu, 01 Apr 2021 18:58:12 +0530

കോവിഡ് 19 തുടങ്ങിയതു മുതല്‍ നമ്മുടെ കൂടിക്കാഴ്ച്ചകൾ ഇന്റര്‍നെറ്റിലൂടെ ആണു്, മാത്രമല്ല വിനിമയത്തിനുള്ള നമ്മുടെ ആവശ്യകത കൂടുകയും ചെയ്തു.

നിലവിൽ മിക്ക സ്വകാര്യസംഭാഷണങ്ങളും സമൂഹയോഗങ്ങളും ചർച്ചകളും ഒക്കെ നടക്കുന്നതു് വാട്സാപ്പ്, ഗൂഗിൾ മീറ്റ്, സൂം, മൈക്രോസോഫ്റ്റ് ടീംസ്, സ്കൈപ്പ്, മുതലായ, ഡിജിറ്റൽ വിവരങ്ങളും അതിനെ ആധാരമാക്കിയുള്ള വിവരങ്ങളും ശേഖരിച്ചു കൂട്ടിവയ്ക്കുന്ന, സൗജന്യ കുത്തകസേവനങ്ങൾ മുഖേനയാണു്.

ഇങ്ങനെ ശേഖരിച്ച വിവരങ്ങൾ മറ്റുള്ള ശ്രോതസ്സുകളിൽ (വിവിധ കച്ചവട സേവനങ്ങൾ, ക്രെഡിറ്റ് കാർഡ് സേവനങ്ങൾ, ആരോഗ്യസേവനങ്ങൾ മുതലായവ) നിന്നു് വിവര ദല്ലാളുകൾ വഴി വാങ്ങുന്ന വിവരങ്ങളുമായി ചേർത്തു് അപഗ്രഥനം നടത്തി നിങ്ങളുടെ ഒരു ഓൺലൈൻ പ്രൊഫൈൽ അവർ നിർമ്മിക്കുന്നു. കുത്തകസേവനങ്ങളിലെ സുരക്ഷാക്രമീകരണങ്ങളിലുള്ള പാളിച്ചകൾ മറച്ചുവയ്ക്കുന്നതിൽ അവർ കുപ്രസിദ്ധി ആർജിച്ചവരാണു്. അവരിൽ നിന്നും ഇന്റർനെറ്റിൽ വിവരങ്ങൾ ചോരുന്നതും ചോർത്തുന്നതുമായി ബന്ധപ്പെട്ട വിവാദങ്ങളും തുടരുന്നു. ഇങ്ങനെ നിര്‍മ്മിക്കുന്ന പ്രൊഫൈലുകള്‍ പരസ്യകമ്പനികൾ, ഇന്‍ഷുറന്‍സ് അല്ലെങ്കിൽ ലോൺ നല്‍കുന്ന കമ്പനികള്‍, രാഷ്ട്രീയ പാര്‍ട്ടികള്‍, ഭരണകക്ഷികള്‍ എന്നിവര്‍ക്ക് വളരെ വിലപ്പെട്ടതാണ്.

നിങ്ങള്‍ ഇന്റര്‍നെറ്റില്‍ കൂടുതല്‍ നേരം ചിലവിടുന്തോറും, നിങ്ങള്‍ അറിഞ്ഞോ അറിയാതെയോ കൈമാറുന്ന വിവരങ്ങളുപയോഗിച്ച് നിങ്ങളെ ലക്ഷ്യം വെക്കുകയും നിങ്ങള്‍ ഓരോരുത്തരേയും നിങ്ങളുടെ ഇഷ്ടാനിഷ്ടങ്ങള്‍ക്കനുസരിച്ച് മാത്രം ലോകത്തെ നോക്കിക്കാണുവാന്‍ പ്രേരിപ്പിക്കുന്ന ഓരോ കുമിളകള്‍ക്കുള്ളിലായി ഒതുങ്ങിജീവിക്കുവാന്‍ നിര്‍ബന്ധിതരാക്കുകയും ചെയ്യുന്നു. നിങ്ങള്‍ എന്ത് കാണണം എന്ന് അല്‍ഗൊരിതങ്ങള്‍ തീരുമാനിക്കുമ്പോള്‍ നിങ്ങളുടെ ഇന്റര്‍നെറ്റ് ഉപയോഗം നേരത്തേ സൂചിപ്പിച്ചതുപോലെയുള്ള കുമിളകള്‍ക്കുള്ളിലായി പരിമിതപ്പെട്ടുപോവുകയും അതു നിങ്ങളുടെ സ്വാതന്ത്ര്യത്തെ സാരമായി ബാധിക്കുകയും തീരുമാനങ്ങളെ സ്വാധീനിക്കുകയും ചെയ്യുന്നു.

ആയതിനാല്‍ നിങ്ങൾ ഒരു വ്യക്തിയോ സംഘടനയോ ആയാലും നിങ്ങളുടെ ഡിജിറ്റല്‍ ആശയവിനിമയ ഉപാധികള്‍ക്ക് മേല്‍ നിങ്ങള്‍ക്ക് നിയന്ത്രണമുണ്ടാകേണ്ടത് അത്യന്താപേക്ഷിതമാണ്. പരിശോധിക്കുവാനും, പഠിക്കുവാനും, മാറ്റങ്ങള്‍ വരുത്തുവാനും, പുനര്‍വിതരണം ചെയ്യുവാനും, സ്വയം സേവനദാതാവായി മാറുവാനുമുള്ള സ്വാതന്ത്ര്യം നല്‍കുന്ന ജിറ്റ്സി പോലെയുള്ള സ്വതന്ത്ര സോഫ്റ്റ്‍വെയർ സേവനങ്ങള്‍ നിങ്ങള്‍ക്ക് നിങ്ങളുടെ വിവരത്തിന് മേല്‍ ഉടമസ്ഥാവകാശവും, സ്വാതന്ത്ര്യവും, സ്വകാര്യതയും നല്‍കുന്നു. മൊബൈലിലൂടെയും ഡെസ്ക്ടോപ്പിലൂടെയും ഉപയോഗിക്കാനാവുന്ന, സുരക്ഷിതവും എല്ലാ സൗകര്യങ്ങളോടും കൂടി, പരസ്പരം കണ്ട് സംവദിക്കുന്നതിന് വേണ്ടിയുള്ള ഒരു സേവനമാണ് ജിറ്റ്സി. ഒരു കണ്ണി പങ്കുവെക്കുന്നത്ര ലളിതമായും അക്കൗണ്ടില്ലാതെയും പ്രത്യേകിച്ചൊന്നും ഇന്‍സ്റ്റാള്‍ ചെയ്യാതെയും ആര്‍ക്കും മീറ്റിങ്ങില്‍ ചേരാം. നിങ്ങള്‍ക്ക് സ്വന്തമായി ഈ സേവനം നടത്തിക്കൊണ്ടുപോകണം എന്നില്ലെങ്കില്‍ നിങ്ങള്‍ വിശ്വസിക്കുന്ന ഒരാള്‍ നടത്തുന്ന സേവനം നിങ്ങള്‍ക്ക് ഉപയോഗിക്കാവുന്നതാണ്.

meet.fsci.in എന്ന ജിറ്റ്സി സേവനം പൊതു ഉപയോഗത്തിനായി നല്‍കുന്നത് വഴി, ‘ഇന്ത്യയിലെ സ്വതന്ത്ര സോഫ്റ്റ്‍വെയർ കൂട്ടായ്മ’ (എഫ്.എസ്.സി.ഐ) നിങ്ങളുടെ വിവരങ്ങള്‍ മറ്റാര്‍ക്കും കൈമാറാതെ തന്നെ മേല്‍പ്പറഞ്ഞ സ്വാതന്ത്ര്യങ്ങള്‍ നിങ്ങള്‍ക്ക് നല്‍കുന്നു. അങ്ങനെ നിങ്ങളുടെ വിവരങ്ങള്‍ സ്വകാര്യമായിരിക്കുകയും അതില്‍ വേറെയാരും തലയിടാതിരിക്കുയും ചെയ്യുന്നു. എഫ്.എസ്.സി.ഐയുടെ മറ്റു് സേവനങ്ങള്‍ പോലെത്തന്നെ ഇതും സ്വതന്ത്ര സോഫ്റ്റ്‍വെയറിന്റെയും സ്വകാര്യത സംരക്ഷിക്കപ്പെടേണ്ടതിന്റെയും ആവശ്യകത പ്രചരിപ്പിക്കുന്ന ഒരു കൂട്ടം സന്നദ്ധപ്രവര്‍ത്തകരുടെ പ്രയത്നത്തിന്റെ ഫലമാണ്.

നിങ്ങള്‍ ഈ സേവനം ഉപയോഗപ്പെടുത്തുവാനും അതിന്റെ പിന്നിലെ ആശയങ്ങളെ ഉയര്‍ത്തിപ്പിടിക്കുവാനും ആഗ്രഹിക്കുന്നുവെങ്കില്‍ ഈ സേവനം രണ്ട് വർഷത്തേക്ക് നടത്തിക്കൊണ്ടുപോകുന്നതിനുള്ള തുകയായ 62500 രൂപ സമാഹരിക്കാനുള്ള ജനകീയ സഹായനിധിയിലേക്ക് സംഭാവന ചെയ്യുന്നതിനായി അഭ്യർത്ഥിക്കുന്നു.

Donate to the campaign

സോഫ്റ്റ്‌വെയർ സ്വാതന്ത്ര്യ ദിനത്തില്‍ സ്വതന്ത്ര സോഫ്റ്റ്‌വെയർ ശിബിരം 2020 പ്രഖ്യാപിക്കുന്നു

Sat, 19 Sep 2020 00:00:00 +0530

സ്വതന്ത്ര സോഫ്റ്റ്‌വെയറും അതിന്റെ മൂല്യങ്ങളും പ്രചരിപ്പിക്കുന്നതിനായി ലോകമെമ്പാടുമുള്ള സ്വതന്ത്ര സോഫ്റ്റ്‌വെയര്‍ പ്രവര്‍ത്തകര്‍ ഇന്നു് സോഫ്റ്റ്‌വെയർ സ്വാതന്ത്ര്യ ദിനം ആഘോഷിക്കുന്നു. അതേ ഉദ്ദേശലക്ഷ്യത്തോടും ആവേശത്തോടും കൂടി ഞങ്ങൾ ഇന്നു് സ്വതന്ത്ര സോഫ്റ്റ്‌വെയർ ശിബിരം പ്രഖ്യാപിക്കുകയാണു്.

സ്വതന്ത്ര സോഫ്റ്റ്‌വെയർ ശിബിരം ഇന്ത്യയിലെ സ്വതന്ത്ര സോഫ്റ്റ്‌വെയർ ഫൗണ്ടേഷനും സ്വതന്ത്ര സോഫ്റ്റ്‌വെയർ കൂട്ടായ്മയും സംയുക്തമായി സംഘടിപ്പിക്കുന്ന ഒരു ഓൺലൈൻ മെന്റർഷിപ്പ് പരിപാടിയാണു്. ഇതു ഒക്ടോബറില്‍ തുടങ്ങി ഫെബ്രുവരി അവസാനം വരെ തുടരുന്നു.

സ്വതന്ത്ര സോഫ്റ്റ്‍വെയറിലേയ്ക്ക് സംഭാവന ചെയ്യാന്‍ താല്പര്യമുള്ളവരായ, എന്നാല്‍ ചിട്ടയോടെയുള്ള മാര്‍ഗദര്‍ശ്ശനവും പഠിക്കാനുള്ള സാഹചര്യവും അതു് തുടങ്ങാനായി ലഭ്യമാവണമെന്നു് ആഗ്രഹിക്കുന്ന ആര്‍ക്കും ഈ സ്വതന്ത്ര സോഫ്റ്റ്‍വെയര്‍ ശിബിരം വിലമതിക്കാനാവാത്ത ഒരു അവസരമായിരിക്കും. ഇത് നിലവില്‍ സ്വതന്ത്ര സോഫ്റ്റ്‍വെയർ സംഭാവകരായിട്ടുള്ളവര്‍ക്കു് പുതിയ സംഭാവകരെ അവരുടെ പരിപാടികളില്‍ ഉള്‍പ്പെടുത്താനും സ്വതന്ത്ര സോഫ്റ്റ്‍വെയര്‍ കൂട്ടായ്മയിലേക്കുള്ള അവരുടെ കടന്നുവരവിനെ സാധ്യമാക്കാനും കഴിയുന്ന ഒരവസരം കൂടെയായിരിക്കും.

പഠിതാക്കൾക്കും മെന്റർമാർക്കും ഇതിലേയ്ക്കു അപേക്ഷിക്കുന്നതിനുള്ള കണ്ണികള്‍ ശിബിരത്തിന്റെ വെബ്സൈറ്റിൽ ഒക്ടോബർ 15 വരെ ലഭ്യമായിരിക്കും.

ഈ ശിബിരം പഠിതാക്കളെ സ്വതന്ത്ര സോഫ്റ്റ്‍വെയര്‍ ആശയങ്ങള്‍ മനസ്സിലാക്കുന്നതിനു സഹായിക്കുന്നതിനോടൊപ്പം സ്വതന്ത്ര സോഫ്റ്റ്‍വെയറിലേക്കു് സംഭാവനകള്‍ നല്‍കുന്നതിനു് പ്രാപ്തരാക്കുകയും ചെയ്യുന്നു. ശിബിരത്തിന്റെ ആദ്യഘട്ടത്തില്‍ സ്വതന്ത്ര സോഫ്റ്റ്‍വെയറിന്റെ സാമൂഹിക ഗുണവശങ്ങളും സ്വതന്ത്ര സോഫ്റ്റ്‍വെയര്‍ സംസ്കാരവും പരിചയപ്പെടുത്തുന്ന അസൈന്‍മെന്റുകളും സമ്പര്‍ക്കപരിപാടികളും ചലനച്ചിത്ര പ്രദര്‍ശനങ്ങളും മറ്റു പ്രവര്‍ത്തനങ്ങളുമടങ്ങിയ പരമ്പരയിലൂടെ പഠിതാക്കള്‍ കടന്നു പോകുന്നു. അവര്‍ക്കു് അവരുടെ സ്വന്തം കമ്പ്യൂട്ടിങ്ങ് ഉപകരണങ്ങളില്‍ സ്വതന്ത്ര സോഫ്റ്റ്‍വെയര്‍ ഉപയോഗിക്കുന്നതിനുള്ള സഹായം ലഭ്യമാകുന്നതാണു്. ഇതിന്റെ അവസാനഘട്ടത്തില്‍ അവര്‍ വിവിധ സ്വതന്ത്ര സോഫ്റ്റ്‍വെയര്‍ പദ്ധതികള്‍ പരിചയപ്പെടുകയും മെന്റര്‍മാരോടൊത്തു് പ്രവര്‍ത്തിച്ച് അതിലേക്കു് സംഭാവന ചെയ്യുന്നതിനുള്ള കർമ്മപദ്ധതികള്‍ തയ്യാറാക്കുകയം ചെയ്യുന്നു. പഠിതാക്കളുടെ കർമ്മപദ്ധതികളനുസരിച്ചു് മെന്ററെ തെരഞ്ഞെടുക്കുന്നു. രണ്ടാം ഘട്ടത്തില്‍ ഓരോ പഠിതാവും അവരുടെ തെരഞ്ഞെടുക്കപ്പെട്ട കർമ്മപദ്ധതിയുടെ അടിസ്ഥാനത്തില്‍ മെന്റര്‍മാരോടൊത്തു് പ്രവര്‍ത്തിച്ച് സംഭാവനകള്‍ ചെയ്തു് തുടങ്ങുന്നു. നിശ്ചിത കാലയളവുകളില്‍ പഠിതാക്കളുടെ ആവശ്യങ്ങള്‍ അറിയുന്നതിനും തടസ്സങ്ങള്‍ മറികടന്ന് മുന്നോട്ടുപോകുവാന്‍ സഹായിക്കുന്നതിനും അവലോകനയോഗങ്ങള്‍ ഉണ്ടായിരിക്കും.

ശിബിര സൈറ്റില്‍ നിര്‍ദ്ദേശിച്ചിട്ടുള്ള മെന്റര്‍ യോഗ്യതകളുള്ള, സ്വതന്ത്ര സോഫ്റ്റ്‍വെയര്‍ മേഖലയില്‍ സംഭാവനകള്‍ ചെയ്തിട്ടുള്ള ഏതൊരു വ്യക്തിക്കും മെന്റര്‍ ആകുന്നതിനു് അപേക്ഷിക്കാവുന്നതാണു്. പഠിതാവിനു് കർമ്മപദ്ധതി തയ്യാറാക്കുവാന്‍ ആവശ്യമായ ആശയങ്ങളുടെ പട്ടികയിലേയ്ക്കു് അവരുടെ ആശയങ്ങള്‍ ചേര്‍ക്കാവുന്നതാണു്. കർമ്മപദ്ധതികള്‍ വിലയിരുത്തുന്നതിലും തെരഞ്ഞെടുക്കുന്നതിലും മെന്റര്‍മാര്‍ ക്യാമ്പ് സംഘാടകരുമായി ചേര്‍ന്നു് പ്രവര്‍ത്തിക്കുകയും തെരഞ്ഞെടുത്ത കർമ്മപദ്ധതികള്‍ വി‍ജയകരമായി പൂര്‍ത്തീകരിക്കുന്നതിനു് പഠിതാക്കളെ പ്രാപ്തരാക്കുകയും ചെയ്യും.

പ്രോഗ്രാമിങ്ങ്, സിസ്റ്റം അഡ്‌മിനിസ്‌ട്രേഷന്‍, പാക്കേജിങ്ങ്, യുഐ/യുഎക്സ്, ഫോറന്‍സിക്സ്, പ്രാദേശികവത്കരണം, കലാവിരുതുകള്‍, വിവരണങ്ങള്‍, പ്രചരണം, പരിപാടികള്‍ സംഘടിപ്പിക്കല്‍ തുടങ്ങി സ്വതന്ത്ര സോഫ്റ്റ്‌വെയര്‍ ആശയവുമായി പൊരുത്തപ്പെടുന്ന എല്ലാത്തരം സംഭാവനകളേയും സംഭാവന ചെയ്യാനുള്ള വഴികളേയും ഈ ശിബിരം പ്രോത്സാഹിപ്പിക്കുന്നു. സ്വതന്ത്ര സോഫ്റ്റ്‌വെയര്‍ ആശയവിനിമയ സംവിധാനങ്ങളായ ബിഗ് ബ്ലൂ ബട്ടണ്‍, മെട്രിക്സ് ആപ്പുകള്‍ തുടങ്ങിയ സംവിധാനങ്ങളുപയോഗിച്ച് ഓണ്‍ലൈനായിട്ടാണു് ഈ ശിബിരം നടത്തുന്നതു്. പ്രവേശനം സൌജന്യമായിരിക്കും.

കൂടുതല്‍ വിവരങ്ങള്‍ക്കും പങ്കെടുക്കാനും https://camp.fsf.org.in സന്ദര്‍ശിക്കുക.

ഫസ്റ്റ് ബെല്‍ - ഒരു തുറന്ന കത്തു്

Wed, 17 Jun 2020 14:48:17 +0530

ആമുഖം

കേരളത്തിലെ പൊതുവിദ്യാലയങ്ങളിൽ ഐ.ടി അധിഷ്ഠിത പ്രവർത്തനങ്ങൾക്ക് നേതൃത്വം നൽകുന്ന സർക്കാർ കമ്പനിയായ കൈറ്റിന്റെ - https://kite.kerala.gov.in/ ചീഫ് എക്സിക്ക്യൂട്ടീവ് ഓഫീസര്‍ക്കു് ഇന്ത്യയിലെ സ്വതന്ത്ര സോഫ്റ്റ്‍വെയര്‍ കൂട്ടായ്മ - https://fsci.in എഴുതുന്ന തുറന്ന കത്താണിതു്. ഓണ്‍ലൈന്‍ പഠന പരിപാടിയായ ‘ഫസ്റ്റ് ബെല്‍’ സംബന്ധിച്ച ചില പ്രശ്നങ്ങളും അവയ്ക്കുള്ള ചില പരിഹാരങ്ങളും താങ്കളുടെ ശ്രദ്ധയില്‍ കൊണ്ടു് വരാനാണു് ഞങ്ങള്‍ ഈ കത്തെഴുതുന്നതു്. ഞങ്ങളുടെ കൂട്ടായ്മ സ്വതന്ത്ര സോഫ്റ്റ്‍വെയറുമായി ബന്ധപ്പെട്ടു് പ്രവര്‍ത്തിയ്ക്കുന്നവരായതിനാല്‍ ഞങ്ങളുടെ നിര്‍ദ്ദേശങ്ങളും ഈ വിഷയത്തില്‍ മാത്രമായി ഒതുക്കുന്നു.

പശ്ചാത്തലം

നേരത്തെ ഐടി@സ്കൂളും ഇപ്പോള്‍ കൈറ്റും സ്വതന്ത്ര സോഫ്റ്റ്‍വെയര്‍ അവതരിപ്പിച്ചും, വികസിപ്പിച്ചും പ്രചരിപ്പിച്ചും കേരളത്തിലെ സ്കൂള്‍ കൂട്ടായ്മകളെ സ്വതന്ത്രരാക്കാന്‍ നടത്തിയ ശ്രമങ്ങളെ ഞങ്ങള്‍ ആദ്യമായി തന്നെ അഭിനന്ദിയ്ക്കുന്നു.

എന്നാലിപ്പോള്‍ വാട്ട്സാപ്പ് ഉപയോഗിക്കാന്‍ താല്‍പര്യമില്ലാത്തവരെപ്പോലും അതുപയോഗിക്കുവാന്‍ നിര്‍ബന്ധിക്കുകയാണ് പല സ്കൂളുകളും[1], വാട്ട്സാപ്പ് അമിതമായി ഉപയോഗിക്കുകയും അതിന് നിര്‍ബന്ധിക്കുകയും വഴി സ്വതന്ത്ര സോഫ്റ്റ്‍വെയര്‍ ഉപയോഗം അട്ടിമറിയ്ക്കുകയാണ് ഇത്തരം സ്കൂളുകള്‍. പ്രത്യേകിച്ചും കേംബ്രിഡ്ജ് അനലിറ്റിക്ക വിഷയത്തിന് ശേഷം സ്വകാര്യതയുമായി ബന്ധപ്പെട്ട് വളരെയധികം കുപ്രസിദ്ധിയാര്‍ജ്ജിച്ച ഫേയ്സ്ബുക്കിന്റെ[2] കീഴിലുള്ള ഉത്പന്നമാണ് വാട്ട്സാപ്പ്. സ്വകാര്യതയുമായി ബന്ധപ്പെട്ട് വളരെയധികം പ്രശ്നങ്ങളുള്ള ഏതെങ്കിലും ഒരു വിദേശ കമ്പനിയെ ആശ്രയിക്കാന്‍ നിര്‍ബന്ധിക്കാത്തതും സ്വതന്ത്ര സോഫ്റ്റ്‍വെയറുകളുമായ മൂഡില്‍ ലേണിങ്ങ് മാനേജ്മെന്റ് സിസ്റ്റം, മാട്രിക്സ് അധിഷ്ഠിത മെസ്സേജിങ്ങ് സേവനങ്ങള്‍[4] പോലെയുള്ള നല്ല ബദല്‍ സംവിധാനങ്ങളാണ് ശരിക്കും കൈറ്റ് പ്രോത്സാഹിപ്പിക്കേണ്ടത്.

വിശദമായി

സ്വകാര്യതയുമായി ബന്ധപ്പെട്ട ആശങ്കകള്‍ കാരണം പലരും വാട്ട്സാപ്പ് പോലുള്ള സോഫ്റ്റ്‍വെയറുകള്‍ ഉപയോഗിയ്ക്കാന്‍ മടിയ്ക്കുകയാണ്. അവരെ ഈ സോഫ്റ്റ്‍വെയറുകള്‍ ഉപയോഗിയ്ക്കാനോ ഈ സോഫ്റ്റ്‍വെയറുകളുടെ ഏജന്റുമാരാവാനോ നിര്‍ബന്ധിയ്ക്കുന്നത് ശരിയല്ല. കൂടാതെ വാട്ട്സാപ്പിന്റെ കാര്യമെടുത്താല്‍ സ്മാര്‍ട്ട്ഫോണില്ലാത്തവര്‍ക്ക് അടുത്തുള്ള വായനശാലയിലെ കമ്പ്യൂട്ടര്‍ പോലും ഉപയോഗിയ്ക്കാന്‍ പറ്റില്ല. പല രക്ഷിതാക്കളും അധ്യാപകരും സ്മാര്‍ട്ട്ഫോണ്‍ വാങ്ങി വാട്ട്സാപ്പ് ഇന്‍സ്റ്റോള്‍ ചെയ്യാത്തതിന്റെ പേരില്‍ മാനസികമായി പീഡിപ്പിയ്ക്കപ്പെടുന്നു. ചിലരെല്ലാം അത് ചെറുത്തുനിന്നു. തീര്‍ച്ചായും സ്കൂള്‍ കൂട്ടായ്മകള്‍ പുതിയത് സ്വീകരിയ്ക്കണം, പക്ഷേ അതു് അപകടകരമല്ലെങ്കില്‍ മാത്രം. എല്ലാവര്‍ക്കും പങ്കെടുക്കാവുന്ന സ്വതന്ത്ര ബദലുകള്‍ മുന്നോട്ട് വയ്ക്കുന്നതും പ്രചരിപ്പിയ്ക്കുന്നതുമാണു് കൂടുതല്‍ നല്ലത്.

ദീ‌ഘകാലത്തേക്കുള്ള ശരിയായ സംവിധാനങ്ങളെ വിസ്മരിച്ചുകൊണ്ട് ഹ്രസ്വകാലലക്ഷ്യങ്ങൾ നേടാനായി സൗകര്യങ്ങൾ മാത്രം നോക്കി ധൃതിയിൽ നടത്തിയ തിരഞ്ഞെടുപ്പുകളുടെ മാലിന്യക്കൂമ്പാരമായിരിക്കുകയാണ് വിദ്യാഭ്യാസത്തിനായുള്ള “ഓൺലൈനിലേക്കുള്ള നീക്കം”. ഉള്ളടക്കം, ഹോംവർക്ക്, തുടങ്ങിയവ പങ്കുവയ്ക്കുന്നതിനായി വാട്ട്സാപ് കൂടാതെ സ്മാർട്ട്ഫോണിന്റെയും മറ്റും അഭാവത്തിൽ ഒരു പ്രത്യേകതരത്തിലുള്ള ഇമെയ്ൽ അക്കൗണ്ടുകൾ (ജിമെയിൽ ആയാൽ നന്ന്) തുറക്കാനായി മാതാപിതാക്കളോട് ചില വിദ്യാലയങ്ങൾ ആവശ്യപ്പെട്ട പല സംഭവങ്ങളുണ്ട്. ആധുനികമായ എന്തെങ്കിലും ചെയ്യുന്നു എന്നു കാണിക്കാനുള്ള സമ്മർദ്ധത്താൽ സ്ക്കൂൾ കമ്മിറ്റികൾ അനൗപചാരികമായെടുക്കുന്ന തീരുമാനങ്ങൾ മോശമായ തീരുമാനങ്ങൾകൊണ്ട് തുടങ്ങുന്നതിനുള്ള നല്ല അവസരമാണ്.

കൈറ്റില്‍നിന്നും വിദ്യാഭ്യാസ വകുപ്പിൽ നിന്നും ഏതെങ്കിലും ഒരു മെസേജിംഗ് സര്‍വീസ് ഉപയോഗിക്കുക എന്ന നിര്‍ദേശമാണ് നൽകിയിരിക്കുന്നത് എന്നാണ് ഞങ്ങള്‍ മനസ്സിലാക്കുന്നത്. എന്നാൽ കോഴിക്കോട് ഡയറ്റിന്റെ മാർഗരേഖയിൽ വാട്ട്സാപ്പ് നിര്‍ബന്ധമായും ഉപയോഗിക്കണം എന്ന് എടുത്തുപറഞ്ഞിരിക്കുന്നു. മൂഡിൽ പോലുള്ള സ്വയം ഹോസ്റ്റ് ചെയ്യാവുന്ന ലേണിംഗ് മാനേജ്മെന്റ് സോഫ്റ്റ്‍വെയര്‍ സ്കെയിൽ (ഒരേ സമയത്ത് ഒരുപാട് പേര്‍ സര്‍വീസ് ഉപയോഗിക്കുമ്പോൾ അതിനനുസരിച്ച് പ്രവര്‍ത്തിക്കാന്‍ ചെയ്യേണ്ടത്) ചെയ്യാനുള്ള ബുദ്ധിമുട്ട് അത്തരം സാധ്യത സ്വീകരിക്കുന്നതിന് തടസ്സമായി.

മാട്രിക്സ് പ്രോട്ടോകോള്‍ ഉപയോഗിക്കുന്ന പല ആപ്പ്ളിക്കേഷനുകളുള്ളത് കൊണ്ട് അവയിലിഷ്ടമുള്ളത് മൊബൈലിലോ ഡസ്ക്‌ടോപ്പിലോ ഉപയോക്താവിന് തിരഞ്ഞെടുക്കാവുന്നതാണത്. കൂടുതല്‍ ഫീച്ചറുകളുള്ള റയട്ടോ (Riot) എളുപ്പത്തിലുപയോഗിയ്ക്കാവുന്ന ഫ്ലഫി ചാറ്റോ (Fluffy Chat) ഉപയോഗിയ്ക്കാം. ഒരു വൈബ് ബ്രൌസറില്‍ നിന്നും നേരിട്ട് മറ്റ് ആപ്പുകള്‍ ഇന്‍സ്റ്റോള്‍ ചെയ്യാതെ തന്നെ ഉപയോഗിയ്ക്കാനും പറ്റുന്നതിനാല്‍ ഒരു പൊതു വായനശാലയിലെ കമ്പ്യൂട്ടറില്‍ നിന്നു പോലും ഇതുപയോഗിയ്ക്കാവുന്നതാണ്.

ശുപാർശകൾ

ഒരു പ്രത്യേക സേവനദാതാവ് മാത്രമുള്ള കുത്തക സേവനങ്ങളല്ലാത്ത മറ്റു ആശയവിനിയ ഉപാധികള്‍ അധ്യാപകരെ പരിചയപ്പെടുത്താനും അവരുടെ ഇടയില്‍ പ്രചരിപ്പിയ്ക്കാനും കൈറ്റ് മുന്‍കൈ എടുക്കണം എന്നാണു ഞങ്ങള്‍ കരുതുന്നത്. വിദ്യാര്‍ത്ഥികള്‍ക്കും രക്ഷിതാക്കള്‍ക്കും വികേന്ദ്രീകൃതമായ മെസേജിങ്ങ് സേവനങ്ങളോ അല്ലെങ്കില്‍ ഈമെയിലോ വാട്സാപ്പിനു പകരമായി ഉപയോഗിയ്ക്കാന്‍ സാധിയ്ക്കണം. അത്തരം സേവനങ്ങള്‍ നല്‍കാനോ സേവനദാതാക്കളെ നിര്‍ദ്ദേശിയ്ക്കാനോ താത്പര്യമുള്ള അധ്യാപകര്‍ക്കു് പരിശീലനം നല്‍കാനോ ഞങ്ങളുടെ കൂട്ടായ്മ ഒരുക്കമാണ്. അധ്യാപകര്‍ക്കു പിന്തുണയുമായി സ്വതന്ത്ര സോഫ്റ്റ്‍വെയര്‍ കൂട്ടായ്മയില്‍ നിന്നും 25 ലധികം പേര്‍ ഇതിനകം തന്നെ മുന്നോട്ടു് വന്നിട്ടുണ്ട്.
മൂഡില്‍ സോഫ്റ്റ്‍വെയര്‍ ഉപയോഗിയ്ക്കാന്‍ ഏതെങ്കിലും സ്കൂള്‍ താത്പര്യം പ്രകടിപ്പിയ്ക്കുകയാണെങ്കില്‍ ഒരു മൂഡില്‍ സേവനമെങ്കിലും ഓടിയ്ക്കാന്‍ ഞങ്ങള്‍ ഒരുക്കമാണ്. ഇതുപോലെ കൂടുതല്‍ മൂഡില്‍ സേവനങ്ങള്‍ ഓടിയ്ക്കാന്‍ എഞ്ചിനീയറിംഗ് വിദ്യാര്‍ത്ഥികളുടെ സഹായം ചോദിയ്ക്കാനും ഞങ്ങള്‍ ഒരുക്കമാണ്.
ഇപ്പോള്‍ വിക്ടേഴ്സ് ചാനലിലെ ക്ളാസ്സുകള്‍ സംപ്രേഷണം കഴി‍ഞ്ഞാല്‍ ആ വീഡിയോകള്‍ യൂട്യൂബിലോ ഫേയ്സ്ബുക്കിലോ ആണ് അപ്പ്ലോഡ് ചെയ്യുന്നത്. ഇതിനോടോപ്പം സ്വതന്ത്ര സോഫ്റ്റ്‍വെയറും സ്വകാര്യത സംരക്ഷിക്കുന്നതുമായ പീയര്‍ട്യൂബ് സേവനം നല്കുന്നതിനെപ്പറ്റി കൈറ്റ് ആലോചിക്കേണ്ടതാണ്. ഞങ്ങള്‍ സ്വന്തമായി പീയര്‍ട്യൂബ് സേവനം https://videos.fsci.in എന്ന വെബ്സൈറ്റില്‍ ലഭ്യമാക്കിയിട്ടുണ്ട്. കൈറ്റിനു സമ്മതമാണെങ്കില്‍ ഇപ്പോഴുള്ള വീ‍ഡിയോകളുടെ ഒരു പകര്‍പ്പ് അവിടെ ലഭ്യമാക്കുകയോ, കൈറ്റിനായി വീഡിയോ സ്വയം അപ്പലോഡ് ചെയ്യാന്‍ അവിടെ ഒരു ചാനല്‍ ലഭ്യമാക്കുകയോ ചെയ്യാം. കൈമാറ്റം ചെയ്യുന്നതനുവധിക്കുന്ന ക്രിയേറ്റീവ് കോമണ്‍സ് ലൈസന്‍സില്‍ വീഡിയോസ് അപ്പ്ലോഡ് ചെയ്താല്‍ നേരിട്ട് യൂട്യൂബ് ചാനലില്‍ നിന്നും നേരിട്ടെടുത്ത് ലഭ്യമാക്കാനും ഞങ്ങള്‍ സന്നദ്ധരാണ്.

നേരിട്ട് ബന്ധപ്പെടുന്നതിന്

ഏതെങ്കിലും അദ്ധ്യാപകര്‍ക്ക് ഒരു കമ്പനിയുടേയും കുത്തകയല്ലാത്ത സ്വതന്ത്ര സോഫ്റ്റവെയറധിഷ്ഠിതമായ ഈ സേവനങ്ങള്‍ ലഭ്യമാക്കാന്‍ താല്പര്യമുണ്ടെങ്കില്‍ താഴെയുള്ള മാര്‍ഗ്ഗങ്ങളിലൂടെ ഞങ്ങളെ ബന്ധപ്പെടാവുന്നതാണ്.

നിങ്ങളുടെ അഭ്യര്‍ത്ഥന ഞങ്ങളുടെ ഓണ്‍ലൈന്‍ ചര്‍ച്ചാകൂട്ടത്തില്‍ ( https://codema.in/free-software-community-of-india-fsci/ പോസ്റ്റ് ചെയ്യാം.
ചർച്ച കാണുക.
ഇമെയിലില്‍ ബന്ധപ്പെടാന്‍ - admin at fsci.in
ഫോണിലൂടെയോ എസെമ്മസിലൂടെയോ ബന്ധപ്പെടാന്‍ - പ്രവീണ്‍ (+91 9561745712) or തന്‍സീം (+91 9446705956, +91 9746495247)ഞങ്ങളെ ബന്ധപ്പെടുന്നു

അവലംബം

https://www.doolnews.com/online-learning-parents-and-teachers-need-attention-education-department-guidelines-454.html (ഈ ലേഖനത്തില്‍ പറയുന്ന മാര്‍ഗരേഖയുടെ പകര്‍പ്പ് ഞങ്ങളുടെ കൈവശമുണ്ട്)
https://www.fsf.org/facebook
https://www.reuters.com/article/us-facebook-cambridge-analytica-factbox/factbox-who-is-cambridge-analytica-and-what-did-it-do-idUSKBN1GW07F
https://medium.com/we-distribute/riot-a-decentralized-slack-like-messenger-powered-by-matrix-25f9b72cd24
http://lists.smc.org.in/pipermail/discuss-smc.org.in/2020-June/003627.html
http://lists.smc.org.in/pipermail/discuss-smc.org.in/2020-June/003643.html
https://education.kerala.gov.in/wp-content/uploads/2020/05/GO-Online-Class-First-Bell.pdf
https://yewtu.be/watch?v=jr2mXSKq3B4
https://codema.in/d/LDwsanKx/open-letter-to-kerala-it-school-kite-director-on-forcing-teachers-students-and-parents-to-use-whatsapp/5

ഈ പ്രസ്താവനയുമായി ബന്ധപ്പെട്ട ചർച്ചകൾക്കായി കോഡെമയിലെ ചർച്ച കാണുക.